Det er viktig å starte med opptrening så raskt som mogleg etter operasjonen. Dei første dagane vil du kanskje kjenne at du blir fort sliten og ikkje orkar så mykje. Men det er likevel viktig å komme i gang. Aktivitet betrar blodsirkulasjonen og er med på å førebyggje blodpropp. Enkel, men viktig førebygging er å bevege litt på føtene medan du ligg i senga. Trening verkar også positivt inn på lungene og er med på å få fordøyinga fortare i gang.

Allereie dagen etter operasjonen vil ein fysioterapeut eller ein sjukepleiar hjelpe deg i gang med øvingar og aktivisering. Etter kvart vil du få prøve å sitje på sengekanten, deretter i stol og gradvis spasere i avdelinga. Du får også rettleiing om korleis du lettast kan hoste opp slim frå lungene.

Etter kvart er det viktig at du sjølv tek initiativ til å komme deg opp av senga og trene. Du kan bevege deg som vanleg inntil smertegrensa. Å gå i trapp er fin trening. Personalet vil vere støttespelaren din i denne fasen, men din eigen motivasjon har mykje å seie for framgangen.

Dersom du er operert for by-pass, bør du unngå å sitje med for stor bøyg/”knekk” i lyske og kne (mindre enn 90). Slik kan du forhindre at blodforsyninga til beinet blir klemd av.

Vi oppmodar deg til å halde fram med å trene etter at du har komme heim. Ta utgangspunkt i dei øvingane du lærte på sjukehuset. Turgåing er glimrande mosjon. Start forsiktig og auk tempoet og lengda etter kvart. Lytt til signala frå kroppen. Det er normalt at det tek nokre veker før du kjenner deg heilt i form igjen etter ein slik operasjon.  

Du kan byrje å ete og drikke same kveld som du er operert. I starten kan det vere vanleg med dårleg matlyst. Då er det betre å ete små, men hyppige måltid. Vi kan tilby deg næringsdrikker og alternativ meny frå kjøkkenet. Det er viktig å drikke rikeleg, helst 2 liter dagleg.

Dersom du får problem med treg avføring, har vi ulike tiltak og tips som kan hjelpe deg. Matvarer som svisker, yoghurt, grovt brød og frukt kan tilrådast.

Generelle kostråd

Kosthaldet har mykje å seie for hjarte og blodårar. Gjennom kosthaldet kan du påverke både feittstoffa i blodet, blodtrykket, blodsukkeret og vekta.

• Et variert og allsidig kost med meir stivelse og fiber. Potet, frukt, grønsaker, grovt brød og kornprodukt.
• Avgrens feittinnhaldet i kosten – et mindre margarin, smør, feite mjølkeprodukt og kjøttvarer.
• Et lite sukkerhaldig kost.
• Bruk lite salt i kosten, særleg dersom du har høgt blodtrykk.

Det er vanleg med smerter i såra etter ein slik operasjon. Du vil derfor få epidural smertelindring gjennom eit kateter som er lagt inn i ryggen. I tillegg vil vi gi deg andre smertestillande medikament til faste tider, og etter behov.

Desse smertene i såra vil minke etter kvart. Det er viktig at du seier frå dersom du har vondt. God smertelindring gjer at du lettare kan vere i aktivitet, hoste opp slim, kvile og få god nattesøvn.

Såret er lukka med små metallstiftar eller sting. Stifta/stinga skal fjernast cirka 12 – 14 dagar etter operasjonen hos fastlegen din. Såret bør vere tildekt med bandasjar til stinga er tekne ut.

Du kan dusje to til fire dagar etter operasjonen. Dusj med bandasjane på, og legg på nye bandasjar etterpå. Vent med karbad til det er gått tre til fire veker.

På avdelinga vil vi følgje med operasjonssåra dine og skifte bandasjar ved behov. Etter heimkomst bør du vere merksam dersom såret blir raudt, hovent, siv eller du får feber. Dette kan vere teikn på betennelse. Ta kontakt med lege for å få ei vurdering.

Det er vanleg med hevelse i beinet som er operert, spesielt i legg og fotblad. Dette kjem av auka blodsirkulasjon. Hevelsen vil minke etter kvart, men det kan ta opptil fleire veker. Det er viktig at du er i aktivitet og at du hevar beinet ved kvile, til dømes på ein fotskammel.

Røyking er uheldig for blodårane til kroppen både på kort og lang sikt. Nikotin stimulerer blodårane til å trekkje seg saman. Åra vil etter kvart bli trongare og stivare. Stoff i røyken gjer blodet meir klistrete. Dette aukar risikoen for utvikling av blodproppar i blodårene til hjartet, hjernen og beina.

Dersom du held fram med å røykje etter operasjonen er det monaleg auka risiko for at blodårene kan gå tette igjen.

Dersom du røykjer, har du no eit gyllent høve til å stumpe røyken. Nytt sjansen til å bli ein eks-røykjar no som du er nyoperert! Start medan du er hos oss. Vi vil gjerne hjelpe og støtte deg i denne prosessen. Ved avdelinga vår har vi eit tilbod om oppfølging av røyetopp. Om du ønskjer det, kontaktar vi deg etter utskriving for å høyre korleis det går.

Du kan få tilbod om å prøve røykjeplaster medan du er innlagd. Det finst ei rekkje produkt å få kjøpt på apoteket som kanskje kan vere til hjelp: plaster, tyggjegummi, inhalator og spray.

Tidspunkt for heimreise er vanlegvis to til tre dagar etter operasjonen.

• Før du reiser, vil du få snakke med ein lege
• Vi måler blodtrykket på begge beina dine for å kontrollere blodsirkulasjonen før du reiser frå avdelinga.
• Vi ordnar med reseptar og eventuelt sjukmelding.
• Du skal til kontroll etter cirka fire veker.
• Ved behov for det, formidlar vi kontakt med heimesjukepleia før du reiser heim.